18, మే 2022, బుధవారం

బొమ్మ కాదా? మరి?...(మిస్టరీ)

 

                                                                                  బొమ్మ కాదా? మరి?                                                                                                                                                                             (మిస్టరీ)

మెక్సికో నగరంలోని ఒక బట్టల కొట్లోని బొమ్మ, బొమ్మ కాదట. అది బట్టల కొట్టు మాజీ యజమానురాలు కూతురి మృతదేహం అని అక్కడి ప్రజలు నమ్ముతున్నారు.

మెక్సికో దేశంలోని చీహుహూ అనే నగరంలో 'లా పాపులర్ అనే పేరుతో వివాహానికి సంబంధించిన బట్టలు అమ్మే ఒక షాపు ఉంది. షాపులో చాలా బొమ్మలు ఉన్నాయి గానీ 'లా పాస్కౌలిత (La Pascualita) అనే పేరున్న ఒక బొమ్మ( షాపులోని మరే బొమ్మకూ పేరు లేదు) బొమ్మ కాదని, అది చనిపోయిన షాపు యజమానురాలు కూతురు యొక్క భద్రపరచబడిన మృత దేహం అని చెబుతున్నారు. లా పాస్కౌలిత అనే బొమ్మ బట్టల కొట్లో గత 80 సంవత్సరాలుగా చెక్కు చెదరకుండా ఉన్నదట.

గత కొద్ది సంవత్సరాల నుండి బొమ్మ పర్యాటకులను ఆకర్షిస్తోంది. నార్త్ అమెరికా, అమెరికా, యూరోప్ దేశాల నుండి బొమ్మ పెళ్ళి కూతుర్ని చూడటానికి కొన్నివేల మంది వస్తున్నారట. చూసిన వారందరూ బొమ్మ యొక్క తదేకమైన, మంత్రముగ్ధుల్ని చేసే చూపులు, ఆ బొమ్మలో వాస్తవికంగా కనిపించే లక్షణాల్ని చూసి అది బొమ్మ కాదని గట్టి నమంకంతో వెళుతున్నారట.

మార్చి 25, 1930 లో పాస్కౌలిత అనే బొమ్మను పెళ్ళికూతురు అలంకరణతో అలంకరించి కొట్లోని గాజు అద్దాల కిటికీ దగ్గర నిలబెట్టేరు. షాపు వైపుగా వెళ్ళే ప్రతి ఒక్కరూ తమ దృష్టిని బొమ్మపై పెట్టకుండా వెళ్ళ లేరు. ఎందుకంటే బొమ్మ యొక్క సహజమైన అందం, మానవుల పోలికలూ ఎవరినైనా ఆకర్షిస్తుంది. బొమ్మ షాపు యజమానురాలు 'పాస్కౌలా ఎస్పర్జా పోలికలు కలిగి ఉన్నదని వెంటనే గ్రహించారు. ప్రజల ఆలొచనలు ఒక ముగింపునకు వచ్చాయి. బొమ్మ, బొమ్మ కాదని, చనిపోయిన షాపు యజమానురాలి కూతురు మృతదేహం అని ఒక నిర్ణయానికి వచ్చారు.

షాపు యజమాని కూతురు ఆమధ్యే, అందులోనూ తన పెళ్ళిరోజున తేలు కాటు వలన చనిపోయింది. కూతురు మీద ప్రేమను చంపుకోలేక యజమానురాలు తన కూతురు  శవాన్ని కుళ్ళిపోకుండా భద్రపరచి, తన షాపులోనే ఒక బొమ్మగా ఉంచిందని కొంతమంది స్థానికులు చెప్పటం మొదలుపెట్టారు. విషయం మీద షాపు యజమానురాలు, ఆమె తల్లి ఒక ప్రకటన చేసే లోపే బొమ్మకు 'లా పాస్కౌలిత అని అక్కడి ప్రజలు పేరు పెట్టేశారు. మెక్సికో భాషలో లా పాస్కౌలిత అంటే 'ఆమె కూతురు అని అర్ధం. శవం ఉనికిని ఊహించారు కాబట్టి సహజంగా దానికి అతీంద్రియ శక్తి ఉన్నదని ప్రచారం జరిగింది. బొమ్మ గురించిన అసాధారణ సంఘటనలు జరిగినట్లు తెలిపారు. ఎవరూ సంఘటనలను ధ్రువీకరించలేదు. ప్రేమ విఫలమైన ఫ్రాన్స్ దేశ మాంత్రీకుడొకడు రాత్రిపూట బొమ్మ దగ్గరకు వచ్చి, తన మంత్రజాలంతో బొమ్మకు ప్రాణం తెప్పించి, ఆమెతో నగరమంతా తిరుగుతాడట. కొంతమంది బొమ్మ చూపులు మారుతున్నాయని, షాపులో తమని వెంబడిస్తోందని చెబుతున్నారు. మరికొందరు రాత్రి పూట బొమ్మ షోరూము కిటికీలో తన స్థానం మార్చుకుంటోందని చెబుతున్నారు

కథలన్నీ భయపెట్టేవిగా ఉన్నాయి. ముఖ్యంగా షాపులో పనిచేసే వారికి, అందులోనూ అత్యంత ముఖ్యంగా సోనియా బర్షియాగా అనే ఉద్యోగికి. ఎందుకంటే పదిహేను రోజులకు ఒకసారి ఆమె బొమ్మపై ఉన్న దుస్తులను తెరచాటున మారుస్తుంది. 'దుస్తులు మార్చడానికి బొమ్మ దగ్గరకు నేను వెళ్ళినప్పుడల్లా నా చేతులు చెమటతో తడిసిపోతాయి. ఎందుకంటే బొమ్మ చేతులు మామూలు మనిషి చేతులులాగానే ఉంటాయి. బొమ్మ కాళ్ళ మీద నరాలు కనబడతాయి. ఆమె బొమ్మ కాదు, నిజమైన మనిషి అని నేను నమ్ముతున్నాను అని ఉద్యోగి చెబుతోంది.

బొమ్మకున్న కథను తీసిపారేయలేము.

కారణం, షాపు ఉన్న ప్రదేశంలో చనిపోయిన వారిని భద్రపరిచే పద్దతికి కొన్ని వందల సంవత్సరాల చరిత్ర ఉన్నదట. అంతే కాదు,ఆమెను గౌరవించే విధంగా మెక్సికో దేశంలో 'డెడ్' పండుగ నాడు బొమ్మ దగ్గర పువ్వులు ఉంచుతారు. అక్కడ స్థానికి స్కూల్ పిల్లలు రోజున బొమ్మ దగ్గరకు వచ్చి ఆమె ఆత్మ శాంతించాలని పువ్వులతో ప్రార్ధన చేస్తారు. అంతేకాక, బొమ్మకు మాత్రం దుస్తులు మార్చేందుకు ఎందుకు తెర ఉంచారో తెలియటం లేదు. ఇప్పటి షాపు యజమానిని అడిగితే, తాను షాపును కొన్నప్పటి నుండి బొమ్మకు తెర ఉన్నది. తెర మూసే బొమ్మకు దుస్తులు మారుస్తామని షాపులోని వారు చెప్పిన తరువాత నాకు పద్దతి మార్చటం ఇష్టం లేదు అని చెప్పారట. షాపు తాలూకు ఇప్పటి యజమాని కూడా బొమ్మను ఎవరూ ముట్టుకోకుండా చూస్తారు. బొమ్మ గురించిన ప్రశ్నలు వేయకూడదని షాపులోకి వచ్చేవారితో చెబుతాడట.

"మమ్మీలను భద్రపర్చిన విధంగానే బొమ్మను కూడా భద్రపరచి ఉంటారు. 1930లలో అంతకంటే మెరుగైన పద్దతి ఏదీ లేదని, మెక్సికోలో చనిపోయినవారిని మమ్మీలుగా బద్రపరిచే పద్దతి 1680 నుండీ ఆచరణలో ఉన్నది.ఇది కూడా అలాంటిదేనని" అంటున్నారు అక్కడి ప్రజలు. కానీ ప్రభుత్వ రంగం బొమ్మ విషయంలో నోరు మెదపటంలేదు. మైనపు బొమ్మ అని చెప్పడానికి కూడా వీలు లేదు. ఎందుకంటే 1930 లలో మైనంతో బొమ్మలు చేసే పద్దతి లేదు.

2012లోనే బొమ్మ గురించిన ప్రచారం ఎక్కువైంది. 2014 నుండే బొమ్మ గురించి విరివిగా పత్రికలలో వార్తలు వచ్చాయి. బొమ్మ గురించిన నిజమైన విషయాలు అధికారపూర్వకంగా వెలువడితేనే నిజమేమిటో తెలుస్తుంది. అంతవరకు ఇది ఒక పెద్ద మిస్టరీగానే ఉంటుంది.

బొమ్మను చూస్తే మీకేమనిపిస్తోంది?

Images Credit: To those who took the original photos.

****************************************************************************************************

కామెంట్‌లు లేవు:

కామెంట్‌ను పోస్ట్ చేయండి